Comune di Spilimbergo
Sito Web Ufficiale - Official Web Site

CHÊ ALTRIS GLESIS DI SPILIMBERC

SS. JOSEF e PANTALEON

L'interno di San Gjusepe
La Capela Marsoni cu' l'altâr e la statua da la Madona da la Sintura

La costrussion di chista Glesia a ei tacada intal 1326, par via da la donassion che i Siôrs di Spilimberc a àn fat al Vescul di Concordia, ofrînt in regâl la cjasa da l'ospedâl (realisada e gjestida da la Confraternita dai Batûts) e il teren dongja, dulà che a ei stada costruida justa apont la Glesia, originariamentri intitolada a San Pantaleon martir.
Intal 1327 la Glesia a ei stada consacrada, ancja se a no era ancjamò finida e afidada a la Confraternita dai Batûts.
Pôcs agns dopo, tal 1342, chista a ei stada fata spostâ e la Glesia a ei passada tal li' mans prima dai Fraris Agostinians e podopo a li' suoris dal stes ordin.
Da chê volta, popolarmentri a ei clamada la Glesia dai Fraris. A ei stada pi voltis restaurada e trasformada, soradut tal XVIII secul, cuant che a ei stada ingrandida l'abside e costruida la capela Marsoni (magnific l'altâr cu' la statua da la Madona da la Sintura); di recent a son stadis realisadis da la Scuela di Mosaic li' stassions da la Via Crucis. 

L'edifissi a si presenta un grum semplis tal contest: la planta a ei retangolâr e la fassada a ei a capana; una statua di San Agostin, dal 1730, a ei parsora al puartâl, realisât tal 1523.
Ancja dentri al manten la semplicitât: a navada unica (origjinariamentri a era a trê), cun sofìt realisât a capriadis e trê absidis gotichis che a presentin sul front cuatri voi, decorâts in mosaic da Rino Pastorutti (1998).

Il Coro di Len

Chel che di grant lungja a rint biel e interessant l'edifissi sacri a ei la presinsa dal Coro di Len, considerât un dai capolavôrs da la scultura in len da l'epoca rinassimentâl. Realisât tra il 1475 e il 1477 dal maestri vicentin Marc Cozzi, al era origjinariamentri metût dentri dal Domo, ma dal 1959, a si cjata inta la Glesia dai Fraris. 

A completâ il patrimoni da la Glesia al è il monumentâl organo mecanic a trê manuâi, opera realisada da Gustâf e Francesc Zanin di Codroip e metût chì tal 1981.

Particolâr dal Coro di Len in un dissen da l'arch. Stefano Zozzolotto (par gjentîl concession)
Particolâr dal Coro di Len
Particolâr dal Coro di Len

SAN ZUAN DAI BATÛTS

Esterno da la Glesia di San Gjovani dai Batûts
Crocifission
Particolâr da la Crocifission

L’origjinaria Glesia a ei stata costruida ator dal 1346 da la Confraternita dai Batûts, che intal 1325 a veva costuît lì dongja un ospedâl, una cjasa di ricovero par puarets, pelegrins e malâts. 

La Glesia, origjinariamentri costruida in stîl romanic-gotic, a ei stada consacrada tal 1361; tal 1487 a ei stada furnida cuntun cjampanil e tra il 1500 e il 1746 la Glesia a ei stada sogjeta a sucessîfs lavôrs di ricostrussion; tal 1875 a ei stada demolida la lojbiuta cui arcs gotics, lôc dulà che a si riuniva il popul manifestânt contro il strapodê feudâl. 

Vuê la Glesia a si presenta a planta retangolâr,  a aula ugnula e in stîl baroc; i afrescs sul sofit (1746) a rapresentin l'Assunssion da la Vergjine, l'Elemosina e la Decapitassion di S. Zuan e a son stâts fats da Josef Buzzi, che al à riprodot i afrescs dal Tiepolo conservâts tal Domo di San Denêl dal Friûl. L'altâr magjôr in marmos policromos al è davant a l'afresc da la Crocifission, ripuartât a la lûs intun moment sucessîf; chista opera, realisada da un pitôr d'oltralp dal XV secul, a esprim cun maestrìa duta la dramaticitât da la sena. A son ancja altris dôs telis: l'Adorassion dai pastôrs e l'Adorassion dai Trê Rês e una pala di Gaspar Narvesa, rafigurânts la Visitassion di Maria a Santa Elisabeta datada 1588. 

A rindi ancjamò pi siôr l'edifissi sacri, mantignînt in ogni câs la sobrietât da l'ambient a son presînts trê altârs dal Sietcent finementri realisâts e un crocefis di len, intaiâts da Jacum Onesti.
Esternamentri a si pos amirâ il puartâl in piera, sormontât dal blason da la Confraternita dai Batûts, cui dêts indice e medio jevâts, e il "cartiglio". 

Su l'architrâf al è incidût l'invît evangjelic: "Parate viam Domini".
Vuê la Glesia a ei dedicada ai muarts di dutis li' gueris.

SAN ROC

San Roc (foto De Rosa)

Tal 1533 su Spilimberc  una tremenda pestilensa a à provocât la muart di 450 personis in trê mês dome.
La popolassion a si è riunida par un voto a la Madona e a San Roc par liberâ i Spilimberghês da la pestilensa mediant la costrussion di una glesia in lôr onôr.
La tradission di fat a vôl che San Roc, intant che al tornava in Francia da un pelegrinaç, cjatânt una sitât devastada da la peste, a vedi confuartât i malâts e a ju vedi vuarîts fasînt il segn da la crôs sui lôr ciarnelis; lânt indenant tal sô viaç al si è necuârt di jessi stât lui stes impestât da la malatia e, par no difondi il mâl, al si è rifugjât  intun bosc.
Chì un agnul a lu à consolât e a lu à guarît, intant che un cjan i puartava ogni dì una pagnoca di pan. San Roc duncja al incjarnava il "taumaturgo" specific par la peste e in chist sens al à cjapât il puest di San Sebastian ta la devossion popolâr. 

La Glesia di San Roc a ei stata finida tal 1536. L'edifissi al era un grum semplis: planta retangolâr e altâr unic, completât cun la rapresentassion di San Roc (realisât da Gaspar Narvesa) e Florian (Sant invocât contro li' malatiis epidemichis massima in Friûl) e cun la Vergjine da la Salût metuda in alt.
Intal 1883 la Glesiuta a ei stada furnida dal cjampanili, pôc dopo al è stât demolît il puartin di fûr. Inta la prima guera mondiâl a ei stada requisida come chê altris Glesiis e doprada come deposit; tal 1922 a ei stada finalmentri restaurada.
Dentri a conserva ancja una pala di Umberto Martina dal 1922 e trê vetradis istoriadis cu' l'Anunciassion e San Roc (2001). 

Ta la tradission sociâl spilimberghês, San Roc a ei simpri stada la Glesia popolâr par ecelensa; intant che il Domo a era la Glesia dai Conts e San Pantaleon (dai Fraris) a era chê da li fameis sioris.

EREMO di SAN ZUAN

L'eremo, come ch'al è vuê, dopo dal restauro
Particolâr dai afrescs dal interno (banchèt di Erode)
Particolâr dai afrescs dal interno
Particolâr dai afrescs dal interno

Una vecja fotografia dai Civics Museus di Udin, a ni mostra come che a era la Glesiuta di S. Zuan dal Romit (dai Eremits), su la strada par Udin, demolida tal 1909: costrussion di pissula dimension, a aula ugnula, pissul cjampanili cun motîf a archets vuarps incrosâts sot la linea di gorna, cun devant un ampli puartin dal Sîscent. Dal edifissi ricuardât tal 1304 (a si conservava ancja una lapide romana ripuartada dal Mommsen) e associât a la Confraternita dai Batûts al è restât dome l’arc trionfâl – vuê ridot a fassada vierta - e la pissula abside, davôr da la cuâl a ei stada tirada su una parêt cui spiovênts dulà che a poja tal centro un pissul cjampanili che al si ispira al precedent.
A no ei pi olma dal ospissi (lazaret) romitori, demolît tal secul passât. Ta la Glesiuta, vierta a li intemperiis, a resta una tela dal Votcent cun S. Zuan Batista, ruvinada e sbregada. Un grum pi preseabil la decorassion a fresc dai prins dal XIV secul, cun Crist Pantocratôr e simbui dai Evangeliscj ta la luneta, Agnul mistic e decorassions ta la volta, olmis di una Anunciassion tai “piedritti”, figuris di Apostui (cualchiduna ancjamò ben visibil), Il tai dal cuel di San Zuan Batista, Banchet di Erode e Bal di Salomè ta li parêts laterâi e in chê intal font.
Esemplis di pitura "previtalesca" in Friûl, a si vissinin a cualchi fresc da l'area bolzanina o ancja furlana (ad esempli chei da la Glesia di S. Giuliana a Avian) tai cuâi ricuarts bizantins-romanics a stan insiemit a reclams gotics. Ancja par via di una cualchi ingjenuitât di linguagjo propriamentri provinciâl che a carica i trats somatics, al è probabil che a fâlu a sei stada la man di un mestri locâl.

Lapide pavimentâl tal esterno

Ta la Glesiuta a si cjatin ancjamò ricuarts smavîts da la decorassion fata tal 1554 da Marco Tiussi e, murada inta la parêt sud, tal esterno, una lapide pavimentâl (1540) cul stema da l'Ospedâl di S. Zuan che a ripuarta  l'estrema opera di misericordia prestada ai muarts tal ospissi. Altris sclesis di lapide dal '500, ma vignuda da Travês a fai da taula di altâr.