Comune di Spilimbergo
Sito Web Ufficiale - Official Web Site

IL CJISCJEL

Stema dai Spengenberg

La storia dal Cjiscjel a si confûnt cun chê dai Siôrs di Spilimberc, i Spengenberg, famea di nobii di origjin carinsiana, fedei a l’Impero, tra chês di pi riguart in Regjon e fra chês presînts tal Parlament dal Friûl, “ministeriales” dal Patriarcât di Aquileia.

Fasint leva sul lôr podê e lustri, a son entrâs dispès in contrast cul Patriarca e in pi di una ocasion a àn complotât cuntra di lui.

L’episodi pi famôs e dramatic al è sussedût tal 1350, in timp da la guera civîl feudâl che a à insanganât il Friûl: ta la planura da la Richinvelda, pôcs chilometros a sud da la sitât, in una vuaita, un pôcs di feudataris partîts dal Cjiscjel di Spilimberc e guidâts dai Spengenberg a àn frontât e copât il vecju ma energjic Patriarca (dopo proclamât Beât) Bertrando di San Genesio. A si son meretâts, da chê volta, il soranom di bertramins o beltramins, peraula cu la cual, ancjamò vuè a son clamâts i Spilimberghês.

 

Il Cjiscjel dal alt

Il Cjiscjel al à sostignût tancj assedis tal cors da li' gueris medievâi tra i Siôrs venets e furlans, resistînt ai ripetûts assalts dai da Camino.
A nol è pussibul ricostruî come che il Cjiscjel al fos stât una volta, dato che al è stât distrut, demolît, ricostruît e ingrandît pi voltis.
Sè che vuè al è visibil dal Cjiscjel di Spilimberc, duncja a no risalìs a un origjinari edifissi, ma a una serie di modifichis che a si son vignudis a somâ via pai secui.
Belsà danegjât da un teremot, il Cjiscjel tal 1511 al è stât incendiât tal cors di una rivolta popolâr; l’ala sud a no ei pi stada ricostruida, a si è salvât dome il cussì clamât Palaç Piturât. Al è stât ancjamò modificât tal 1566; intal 1865 a ei stada demolida la torisela sul pûnt e ingrandît l’ingrès; a son stâts fats altris cambiaments (a son sparîts il pûnt levatoio, li tors, li merladuris, terassis e gjardins) che a àn puartât a la configurassion di vuê.
Il Cjiscjel a si presenta vuê come un insiemit di residensis signorii, disponetis a anel ator da la granda cort centrâl, e al è circondât par metât da un profont fossâl, la che pal rest al è a pic su di una scarpada dal Tiliment.

particolâr da l'ingrès
Cjiscjel viodut da la Plassa dal Domo

Traversât il pûnt sul fossâl, a si passa sot la tor di entrada e a si riva tal curtîf.

A sinistra a si jeva il Palaç Tadea (1566), belsà sede Municipâl, fat costruî da Bernardo e finît da la so femina Tadea di Spilimberc tal 1566: al presenta al siò interno, al prin plan, un biel salon cui stucs sincsentescs.

Subit tacât al è il Palaç Ciriani (cumò Furlan), che al conserva ta l’interno una decorassion cun stucs di Giovanni da Udine dal 1542 pi o mancul e rests di afrescs dal XVI secul.

Di seguit, il Palaç Troilo (XVI secolo), costruît da messer Troilo, in seguit a l’incendio dal 1511, al è stât afrescât tal 1544 da Marco Tiussi, cun pituris che ben prest a si son ruvinadis; tal 1864, cuant che il Friûl al era sot l’autoritât austriaca, il Palaç al è stât consegnât al Comun e fin al 1968 al è stât doprât come preson; vuê a si podin ancjamò viodi dôs celis al plan cjera. Il prin plan al è invessit doprât come archivio comunâl.

Il Palaç Piturât
Il Palaç Piturât
Il Palaç Piturât viodût da sud

Pi a destra a si cjata il Palaç Piturât, vant dal comples cjiscjelan, l’edifissi pi impuartant e di grant efiet scenic, ricostruît a la fin dal Tresinta su li' ruvinis di un edifissi preesistênt, distrut da l’enesim incendio: al à ospitât Carlo V tal 1532, Bona Sforza, regjina di Polonia, tal 1566 e ancja Enrico III di Francia tal 1574.

La grassiôsa e afassinânt fassada a ei furnida di afrescs che a rafigurin cjavai e palafreniêrs, virtûts teologâi e cardinâi atribuidis a Andrea BELLUNELLO (XV secul), oltre a dôs triforis, una in stîl gotic e chê altra in stîl rinassimentâl (1582); a rindila ancjamò pi biela, a no mancjin elements in piera realisâts dal PILACORTE: doi balcons triforâts e un pajôl.

Particolâr dai afrescs da la fassada di Palaç Piturât
Particolâr dai afrescs da la fassada di Palaç Piturât
Particolâr dai afrescs da la fassada di Palaç Piturât
Particolâr dai afrescs da la fassada di Palaç Piturât
Particolâr dai afrescs da la fassada di Palaç Piturât
Ala Sud cui rests da la part incendiada
Ala Ovest
L'ussida dal Cjiscjel viers Plassa dal Domo

Il prolungjament dal Palaç Piturât al è testimoni da la precedent presinsa di una altra ala dal Cjiscjel, che a racordava la ala est cun chê ovest: chista part però, dopo dal incendio dal 1511 a no ei stada pi ricostruida e vuê a permet duncja una largja e sugjestiva vista sul Tiliment.

Il cjanton sud-ovest al è ocupât da un edifissi la cuâl antichitât a ei atestada da rests di fignestris archiacutis e dal spessôr spropositât dai mûrs perimetrâi.

Il complès a si siera cu la grant ala ocidental, costituida da un complès di edifissis dal XVI e XVII secul, di proprietât privada, che a sierin l’anel, permetînt di rivà di gnôf a la tor d’ingrès.

Da li' origjinariis struturis difensivis che a consistevin in un dopli pûnt levatoio, in possents mûrs di sinta e in svariâdis tors, a no resta che cualchi palit segn.