Comune di Spilimbergo
Sito Web Ufficiale - Official Web Site

IL DOMO DI SANTA MARIA MAGJÔR

Fassada Nord dal Domo

L’edifissi, tacât tal 1284, al è il pi biel monument da la Sitât; al è stât tirât su dongja da la vecja sinta muraria, da la cuâl al à cjapât dentri una tor, trasformada dopo intun cjampanili.
Il Domo a si è arichît tal cors dai secui di tancj capolavôrs, cualchidun ancjamò conservât tal siò interno, altris trasferîts ta la Glesia dai Ss. Gjusepe e Pantaleon, altris ancjamò zûts pierdûts o robâts.
Tancj a son stâts i lavôrs di restauro e di trasformassion che a àn interessât il Domo.
Il 6 di Mai dal 1976 la violensa dal teremot a someava che a ves in pôcs moments metût fin a dut: il Domo al à resistût ma al à ripuartât dans gravissims e dome la sveltessa cu la cuâl al è stât puntelât a à rivât a salvâlu da li tantis scossis che a son rivadis dopo, soradut chês dal 15 di Setembre.
Il monument al era in prin concepît in maniera diferent: al è nassût di fat sot l’inflùs da l’art romanica, ma al è cressût lentamentri proprit intun periodo di transission dulà che a tacava a mostrâsi, fin a cjapâ il soravînt, l’art gotica.
Di concession snela e slanciada, basât su ecuilibrios ardîts, il gotic al à dat al Domo maestositât e elegansa; al è stât forsi completamenrti  finît intor da l’an 1420. Al misura in dut 45 metros di lungjessa, 21 di largjessa e ben 20 metros in altessa.

Sul la banda setentrionâl a si viêrs il monumentâl puartâl in piera di ZENONE DA CAMPIONE (1376), capolavôr di architetura e scultura, clamât puarta moresca, entrada dai Siôrs.

La fassada principâl, chê a ovest, a ei caraterisada da siet rosôns, particolâr unic in Friûl.

La puarta "moresca"
La puarta "moresca"
la fassada a ovest cui rosôns

Ta l’interno il Domo al presenta tre navadis, dividudis da colonis striadis afrescadis, che a puartin arcos ogjvai, ancja chei decorâts. Il sofit al è a capriada di len e il presbiteri al è stât rialsât par dà spassi a la cripta che a ei subit sot.

Ta la navada di sinistra: l’altâr di S. Andrea cun tela di GIUSEPPE HEINTZ IL GIOVANE dal 1655 rafigurânt il martîri dal Sant; l’altâr di San Gjovani Batista e chel dal Sacro Côr.

Ta la navada di destra: l’altâr di San Fransesc cun tela di PALMA IL GIOVANE dal XVII secul; la Capela dal Carmine cun sculturis dal PILACORTE; la Capela dal Rosari cun telis di GASPARO NARVESA (fin XVI – inissi XVII secul).

Ta la navada centrâl: il maestôs organo in stîl rinassimentâl; il casson al è decorât cun breis e telis di GIOVANNI ANTONIO PORDENONE (1525).

Vêrs gjoiei dal Domo a son i afrescs da li absidis, ducj dal Tresinta. I colôrs a son di un morbit pastel e su ducj a prevàl il vert. Li' imagjinis, ta la lôr aparint semplicitât, a emanin una sensassion di fiabesc, di naif.
Ta l’abside di sinistra a son rafigurâts il Crist Gjudice, l’Anuncio ai pastôrs, la Nativitât, il Viaç dai Magi, la Madona in Scagn, San Jacum che al ressussita il picjât e il Martîri di San Sebastian.
L’abside centrâl a ei un grum siora e a presenta il grant ciclo di afrescs che a taca su la parêt di destra cun Storiis dal Vecju Testament (14 scenis biblichis) e a finìs su la parêt contraria cu li Storiis dal Gnôf Testament (14 scenis evangelichis); jevant i voi su la volta al è pussibul amirâ dentri li' velis chel che a resta dai afrescs dai Evangeliscj metûts a flanc dai Dotôrs da la Glesia. Il ciclo di afrescs, dai cuai ben legjibii a son dome chei da la fassa inferiôr, cuierta par secui dai stai dal coro di len di Marco Cozzi (1477), a risulta strentamentri dipendênt da chel di VITALE DA BOLOGNA dal Domo di Udin dal cuâl a ripet i sogjets da li scenis, il lengaç stilistic, la tension e la vivacitât narativa.
Tra li' dôs fignestris davôr l’altâr a si jeva la Crocifission, che a esprim duta la dramaticitât da la scena.
Come che a testimonia una iscrission su piera su la banda sinistra da la fassada da la Capela Magjôr, Spilimberc, e in particolâr il Domo, al à ospitât l’imperadôr Carlo V, che al tornava indavôr da Viena, ta l’Otobre dal 1532; propit intal Domo a ei stada celebrada una messa granda in siò onôr a la fin da la cuâl, in segn di riconossinsa, il stes sovran al à nomenât tancj cavaliêrs.
Inta l’abside di destra a si cjata il Font Batesimâl dal PILACORTE (1492).

Lant jù par li scjalis a si entra ta la sugjestiva cripta, la cuâl strutura a poja su colonis possentis che a tegnin su li' voltis a crôs. Uchì al è pojât il sarcofago di Walterpertoldo IV, nobil spilimberghês, dal XIV secul (prima metût fôr dal Domo, tal sagrât). Simpri in cripta cualchi afresc dal Tresinta e un altâr in piera costruît in onôr di San Leonard da Paolo di Spilimberc a ricuart da la bataia su l’Isonzo contro i Turcs tal 1472, come ringrassiamênt par jessi scjampât a la prisonìa turca.

sarcofago di Walterpertoldo
altâr di San Leonard
particolâr da la Cripta
particolâr di un afresc da la Cripta

Il Coro di len e i Codics miniâts dal Domo di Spilimberc a costituissin un dai episodis pi significatîfs di un ambissiôs programa promovet dai nobii consorts in acordo cun li' autoritâts locâi.

Intal 1475 Etore di Spilimberc, esecutôr testamentari dal plevan pre’ Giuliano da Tropea, al afida al vicentin Marco Cozzi l’incaric di intaiâ il coro di len sul model di chel da la Glesia dai Fraris di Venessia; il splendit coro di len, capolavôr gotic, al si compon di 24 stai, ognidun sormontât da la figura di un sant; tal 1996 al è stât restaurât e metût, definitivamentri ta la Glesia dai Ss. Gjiusepe e Pantaleon, tal centro storic da la Sitât.

In Canonica a son conservâts i Codics miniâts dal Domo di Spilimberc: sîs Codics di pergamena – sinc graduai e un antifonari – fats tai agns dal 1483 al 1507, ricamentri decorâts cun splendidis miniaturis, da li' voltis a plena pagjina, dal udinês GIOVANNI DA CRAMARIIS, destinâts a la oficiadura granda diurna e noturna.