Comune di Spilimbergo
Sito Web Ufficiale - Official Web Site

IL PALAÇ DAI SPILIMBERC "DI SÔRA"

Palaç dai Spilimberc "di Sôra"

I prins documents che a testimonin l'esistensa dal Palaç di Sôra a rissalissin ai prins dal 1300, cuant che a Fulcherio a ghi è stada assegnada la "cerchia" di Valbruna, in seguit a una division patrimoniâl, cul compit di costruivi un "castrum" e un fossâl. Tal mês di Mai dal 1499 un concordât a permet a Paolo (fì di Odorico di Spilimberc) e ai nevôts, di ingrandî e rindi pi biel e pi grant l'edifissi esistent.

Sta di fat che il Palaç al è stât completamentri ristruturât: da edifissi medievâl, a ei stada creada una vila sincsentesca, che a si rifaseva ai modei detâts dal gust venessian.
La vila, ristruturada durant i secui sucessîfs, a si presentava in chê volta cun amplis salis dai sofits un grum alts, su li' parêts a si viersevin fignestrons luminôs e tal interno da la vila a erin stâts predisponets i servissis igjenics.

La notorietât di chistu Palaç a ei data dal fat che al à ospitât la sede da l'Academia Parteniana tra il 1538 e il 1541, istitussion sostignuda da Adriano di Spilimberc e direta da Bernardino Partenio.
Ta li' amplis salis da la vila i students a podevin dedicâsi ai siei studis, tal oratori di San Roc, subit dongja, a podevin partecipâ a li' celebrassions liturgjchis e tal interno dal gjardin a vevin môt di zuiâ tra di lôr e praticâ ativitât fisica (ancja chê proioduda tal programa scolastic). Uchì al à insegnât Stancaro, il cuâl a si ocupava, tra li' altris robis, di impartî lessions di ebraic, par miei lei e interpretâ i Tests Sacros. Chiscj insegnaments a vignevin però interpretâts come eretics e duncja a erin malviodûts.
La vita da l'Academia a ei stada un grum brêf e a no ei sopravissuda tant timp dopo la muart di Adriano di Spilimberc. 

Il possès da la vila e la zona ator ator a ei restada ai Conts fin tal 1920, an tal cuâl la proprietât a ei stada rilevada da la famea Ciriani.

Dopo sucessîfs passagjos di proprietât e diviersis funsions vûdis dal Palaç (residensa signorîl, stabiliment bacologjic e ricovero par l'esercit), il stes al è stât comprât dal Comun di Spilimberc che, dopo un complicât restauro, a lu à destinât a sô sede tal 2002.

L'atual aspiet dal Palaç al è riconducibil a una serie di intervents fats tra il Sincsent e il Sîssent: chiscj a àn puartât a la realisassion da la scjalinada e da la trifora su la fassada; dopo a son stâts fats altris lavôrs di restauro di impuartansa minôr.
Dopo dal teremot dal 1976 però, il Palaç, ch'al veva conossût moments di splendôr, al è stât bandonât.
Dome tal ultim decenio a si è recuperât l’interès par il Palaç, e, dopo che il Comun a lu à comprât, a son tacâts i ultins restauros.

La fassada dal Palaç, dopo la rimossion da la stabilidura che a veva cuviêrt i afrescs fin dal Sietsent, a conserva l'origjinaria decorassion, che a si rifà a temis mitologjics, storics e floreâi, conferînt a l'edifissi maestositât e elegansa.

Palaç di Sôra - particolâr da la fassada
Palaç di Sôra - particolâr da la fassada
Palaç di Sôra - particolâr da la fassada

Tal interno la gran part da li' operis artistichis a ei stada pierduda, ma, chel che al è rivât fin a vuê, a testimonia la ricjessa e il gust rinassimentâl. Il restauro interno al à puartât a la lûs, in dôs stansis al plan cjera, i stucs da l’artist furlan Giovanni Battista Piccin, realisâts cun maestria intor al 1776; altris elements decoratîfs testimonis da la ricjessa dal Palaç a son li' elegantis spechieris e li' grandis cornîs ovai.
Par rindi ancjamò pi sioris li' salis, il Comun al à comprât dai rafinâts lampadaris realisâts cul veri di Muran; cun di pi cul restauro a son stâts tornâts a meti a gnôf i paviments a teràs in stîl venessian.

Chel che a rînt ancjamò pi biel chist lôc al è il panorama che a si gjolt: a si pos amirâ il jet dal Tiliment e il teritori ator ator fin ta li' montagnis da la Ciarnia.

Da l'oratori di San Rochet, che al era tacât a la sinta muraria ator dal Palaç, a si podin viodi vuê dome li' fondis. Al era costituît da un'aula retangolâr di siet metros, pi o mancul, e a si presentava un grum semplis, in contrast cu la ricessa dal Palaç. La sô distrussion a risalìs ai prins dal Nûfsent e, par via di un incendio scopiât tal 1918, li' pocjis olmis che a erin restadis a son stadis scanceladis.

Il Palaç a si inserìs inta la carateristica Valbruna, borc basmedievâl da li' tipichis costrussions popolârs, vicui strets, puartins e curtivuts internos.

Palaç di Sôra - particolâr da li' stansis internis
Palaç di Sôra - Sala dai Stucs: particolâr
Palaç di Sôra - particolâr da l'i stansis internis