Comune di Spilimbergo
Sito Web Ufficiale - Official Web Site

La Sitât

La Sitât e la sô Storia

Spilimberc al cjapa il non dai Conts carinzians Spengenberg che a son vignûts uchì ator dal XI sec. 

Il prin document che al ripuarta il non dal “castrum de Spengenberg” al è dal 1120 ma la storia dal puest a èi ben pi vecja, poiât come ch'al jera dongja da la strada romana che, traviers il Tiliment, a zontava Sacîl a Glemona e di lì la Gjermania. Cundipì la presinsa dal Cjastilêr di Gradiscja sul Cosa a ni testimonia  una milenaria continuitât abitativa. 

La storia dal borc a si confont cun chê dai Siôrs che a jerin tra i pì impuartants da la regjon e "ministeriales" dal Patriarca di Aquileia. Contro il cjiscjel che lôr a àn volût “munitissimo e magnifico”, a si son abatûts i sfuarçs di tancj aversaris, in particolâr di Ezzelino da Romano e di Rizzardo da Camino. 

La sitât, tal Medioevo, a èi stada un impuartant centro di transit e di comercios, prospera e florida tant che, par contignî una popolassion simpri pì in cressi,  comprindudis tantissimis fameis di lombarts, di toscans scjampâts e di ebreos, a à dovût, in pôc timp, fâ su ben trê sintis muradis. 

Il 4 di Otobre dal 1284 Walterpertoldo II, siôr dal puest, al à metût jù la prima piera dal Domo che vuê al è il pì inlustri monument romanic-gotic dal Friûl -Venessia Gjulia. In chei agns al è stât fat ancja il Palaç dal Dassiari, la Cjasa dal Cjapitani e la Lobia o Pergola, sede di rapresentansa dai giusdicenti, dopo doventada solâr, preson, teatri e, fin a pôc timp fa, munissipi. 

Il 10 di Avôst dal 1326 i nobii fradis Bregonia e Bartolomeo a àn promulgât il "Statût da la Cjera di Spilimberc", un corpus di normis juridichis e di condota par ogni aspiet da la vita sociâl, dulà che ancjamò a à il primât la leç da la fuarsa su la fuarsa da la leç; sîs agns prima, il 2 di Dicembre, a jera stada una division dai bens da la cjasada comitâl che a si à dividuda in doi troncons clamâts "di Sôra" e "di Sot", dulà che il confin teritoriâl al jera l'atuâl Cors Roma - via Cavour che al cor dal Cjiscjel a Taurian e che ancjamò al segna la banda a mont e a misdì da la sitât.  

Tal 1420 la sitât, come par altri duta la Patria dal Friûl, a èi passada sot il domini da la Serenissima e a je lada davôr cun pì o mancul fortuna. Il lôc al è doventât teatri di vueris e di sanguinosis lotis civii: o ricuardìn almancul chê tra "Strumieri" (filo imperiâi) e "Zamberlani" (filo venessians), cuant che, tal 1511, al è stât brusât il Cjiscjel. Al è stât dopo tornât a fa sù davôr dai modei rinassimentâi e tal 1532 al à ospitât l'imperadôr Carlo V. Di chistu periodo a èi la bielissima "Chronica" di Roberto dulà che a vegnin fedelmentri contâts fats e robis brutis sussedudis ta la prima metât dal '500. 

Tal XV e XVI sec. Spilimberc al à cognossût il siò pì grant splendôr: uchì a àn lavorât tancj artiscj di valôr come i alievos di Vitale da Bologna che a àn lassât in Domo un ciclo di afrescs di pì di 500 mq., Zenone, Pilacorte, Marco Cozzi, il Pordenone, Amalteo, Narvesa e chê Irene che, pur muarta zovina zovina, a à vût fama di brava pitora e a èi stada alieva dal Tiziano. Fia di Adriano e da la venessiana Giulia da Ponte a jera nassuda tal 1541 a Spilimberc "d'un gran torrente in su l'herbosa riva" (il Tiliment). La sô muart capitada a Venessia tal 1559, celebrada da li' penis dai miôr scritôrs talians dal timp, a veva reclamât ancja l'atension dal Vasari che la definìs "vergine bellissima, letterata, musica ed incamminata nel disegno"

Tra i leterâts a si ricuardin Gian Domenico Cancianini, Eusebio Stella e Bernadino Partenio che al à creât una Academia dulà che a si insegnava in mût aprofondît leteris latinis, grechis e ebraichis.

Tra il XVI e il XVII sec. a tachin a vignî fôr fameis cun patrimonis impuartants come i Balzaro, i Monaco, gli Stella, i Cisternini, i Fannio, i Santorini che a àn dât a la sitât una impronta tipicamentri borghês. A àn contribuît a chistu la lôr cultura, i lôr palaçs e i lôr comercios che, tant che in alt che in bas, a àn dât una scjassâda al rìgjit schematisim dai nobii e al imobilisim dai popolans che a vivevin, no par colpa lôr, intun mont limitât e condissionât da fraturis vistosis no ultima chê da la bariera da la lenga: di una banda siôrs e nobii che a si esprimevin in latin e in venet e da chê altra popolans analfabets che a fevelavin dome furlan. 

A si jera dongja dal secul dai lums e i segnâi dal cambiament, ancja se flaps e velâts, a jerin se no altri se i considerìn che popolassion semplis e borghesia a si oponevin dispès a musa vierta a la cjasada comitâl.  

Cul tratât di Cjampfuarmit dal 1797 Spilimberc al è passât a l'Austria e in chei agns tumultuôs ancja uchì a si son manifestâts ferments liberâi di grant interès. Cualchi Spilimberghês di fat, al è stât in prima linea a partî dal 1848/49, specialmentri cun Gian Battista Cavedalis e Leonardo Andervolti che a àn vût una part impuartant inta la resistensa contro i Austriacs a Osôf e a Venessia. 

Tal 1866 la Regjon a ven anetuda al Ream da l'Italia. 

Tal 1922, par interessament dal Comun e da la Societât Umanitaria di Milan, a èi stada fondada la Scuela di Mosaic, intitolada a Irene; i siei alievos ator in dut il mont, a gjoldin di meretada fama. 

Spilimberc, a èi doventada Sitât cun D.P.R. 9.10.1968 e a èi vuê in sintonia cui timps; a si è tant rinovada ancja se la sô musa pì vera a èi chê che ogni dì a si pant in chei monuments che a testimoniein un passât meritevul di memoria. 

Il taramot dal 1976 e la rinassita

Il 6 di Mai dal 1976, pôc dopo li' 9 di sera, dopo di una scossa pì lisera, un violent somoviment (ondulatori e sussultori) ch'al à durât  57 seconts, cun epicentri il mont San Simeon, dongja di Glemona, al à scaturît il côr dal Friûl, semenant distrussion, muart, disconfuart e desolassion tai côrs e ta li' robis. 

Ancja Spilimberc al à cognossût li' sgrifadis tremendis dal teremot, robonis di dams e devastassions ai edifissis e al siô patrimoni storic e artistic; dome la rapiditât e la sapiensa che a son stâts puntelâts i edifissis e i monuments dal centro storic a àn permetût di salvâju da li' sucessivis, ripetudis e violentis scossis, soradut chês dal 15 di Setembre.

La sitât a èi stada inserida tra i Comuns gravementri danegjâts e a à vût un muart. 

Ma l’orgoi, la fuarsa d’anim e il tignî dûr dal popul furlan e cun la solidarietât e  l’aiût concret dal mont intêr a àn permetût il miracul da la ricostrussion, da la rinassita e di un gnôf svilup: un esempli a nivel internassionâl.

Par chistu, Spilimberc, cun chei altris Comuns furlans protagoniscj di chista rinassita, al è stât decorât cu la medaia d'oro al merit civîl, cun chista motivassion: "in ocasion di un disastrôs teremot, cun granda dignitât, spirit di sacrifissi e impegno civîl, a frontava la difissil opera di ricostrussion dal tessût abitatîf, e ancja da la rinassita dal proprit futûr sociâl, morâl e economic. Splendit esempli di valôr civic e di grant sens dal dovê, meritevul da l'amirassion e da la ricognossensa da la Nassion duta."