Comune di Spilimbergo
Sito Web Ufficiale - Official Web Site

Sitâts zimuladis

Spilimberc a èi zumulada cun:


LA CHÂTRE (F)

Stema di La Châtre (F)

La sitât fransesa di La Chátre, cu la cuâl Spilimberc a ei zimulada, a si cjata tal bas Berry, tal Dipartiment da l'Indre. A conta pi o mancul 5000 abitants e a ei al centro di un grant teritori con vocassion agricola ma indulà che a regna pulît ancja il comercjo e la pissula industria.

La Chátre, tal côr da la Francia, a ei nassuda sui rests di un acampament roman (castra) da dulà che a ven il nom, e a à conossût, traviers i secui, li' pi grandis vicendis storichis dal Paîs.

A ei conossuda soradut par jessi stada cjantada da la poetessa George Sand che a à passât tancj agns da la vita inta la sô vila di Nohant, meta di obligo dal Romanticisim fransês. Al è ancjamò uchì di fat il pianoforte di Chopin, il studi di Delacroix ma soradut l'atmosfera ovatada da li' "belles heures de jadis", atmosfera che a ven evocada dai branos musicâi di Listz e dai cjants di De Musset. Dal 1964 di fat tal mês di Jugn, uchì a si tegnin li "Fêtes Romantiques de Nohant" cu la partecipassion di figuris di ecession come Arthur Rubínstein, Yeudi Menuhin e Louise de Vilmorin.

Tal mont agricul europeo La Châtre a ei un grum conossuda come sede di una impuartant mostra - concors di bovins Charolais che a si ten ogni metât Dicembre e che a tira dongja alevadôrs e estimadôrs di tancj Paîs.

Particolarmentri di reclam al è il «Grand Prix Automobile de La Châtre" che a si disputa tra la fin di Mai e i prins di Jugn, ta la setemana precedent li "24 oris di Le Mans», su un circuit di dome 1267 metros, ma particolarmentri difissil e spetacolâr.

Valà al sît ch'al fevela di  LA CHÂTRE (F)

Valà al gjornâl dal teritori di La Châtre  (L'Écho du Berry)

SACHSENBURG (A)

Stema di Sachsenburg (A)

Valà al sît uficiâl di SACHSENBURG (A)

Sachsenburg a si cjata ta l'imboco da l'alta val da la Drava, su la destra di un'ansa dal flum a forma di semisercli che a rînt il puest strategjic come mai altri. Cui che a lu possedeva di fat al podeva controlâ militarmentri il teritori retrostant e favorî i trafics par i cuai, naturalmentri, al pretindeva un pedagjo.

Tal 798 Carlo Magno, su pression dal vescul Paolino, al à creât la diocesi di Salisburc e tal 811 al à  fissât il confin dorinvia il cors da la Drava, la Carinzia meridionâl, e duncja ancja la cjera di Sachsenburg, a àn gravitât stabilmentri su la vastissima diocesi di Aquileia, in chê volta mari culturâl e spirituâl di tancj popui, lânt a formâ chel straordenari mosaic etnic e religjôs clamât Patriarcât.

Tai prins dal IX secul a si conta che il stes imperadôr Carlo al vepi uchì confinât un pocjis di fameis ribei da la Sassonia e che da in chê volta il puest a si sei clamât Sachsenburg, vâl a dî sitât dai Sassoni. Altris invessit a sostegnin che il nom da la sitât a derivi dal strument par tamesâ i savalons aurifers, un timp presînts ta l’aga dal flum. E chistu strument, a rason o a tuart, a comparìs ancja tal stema comunâl.

Il prin document uficiâl che al menziona il lôc al è però dome dal 1213. Fin al 1803 su Sachsenburg al à esercitât il podè il Vescovât di Salisburc che al à projodût in pi voltis a circondâ il paîs di murais e a costruî a li' sôs spalis dôs fortessis par miei protesîlu da li miris dai potents vissins.

Ma dopo da la vitoria dai Fransês a Wagram ancja Sachsenburg a si è rinduda e il castigamats Napoleon al à pretindût che li' fortificassions a fossin sdrumadis.

Ca e là al è ancjamò cualchi rest dal castrum in piera grisa scura, a testimoniansa di un passât gloriôs.

Al è sugjestîf dal alt dal Kalvarienberg viodi il paîs ta la sô gjeometria essensiâl. Su chistu mont Calvari (un nom ch'al è dut un programa) a si va par un sentiêr di cjavris, cu la lenga fôr e il côr dentri ch’al fai tum-tum.
Pi in là a cor via, sglonfa di aga biela verda e selesta, la Drava, un flum su li' cualis rivis, propit in chiscj puests, tra Lienz, Oberdrauburg e Spittal, a si è consumada tra la fin di Mai e i prins di Jugn dal 1945 la tragjedia dai Cosacs. Di front dai Inglês che a ghi vevin prospetât il lôr rimpatri sfuarsât in Russia, i Cosacs, cjapâts dal terôr par via che a savevin benon sê che a ju spietava, a àn sercjât la lôr salvessa intuna fuga mata, butantsi cun intensions suicidis, cui cjars e i cjavai dentri ta la Drava in plena. Sui cjars a erin ancja vecjus, feminis e fruts. Al è stât un vêr e propit gjenocidi. Testimonis oculârs a contin di scenis tragichis indescrivibii: a somea impussibul che puests cussì trancuii e biei a sedin stâts spetatôrs muts di una tragjedia simil.

Dismontâs jù dal Calvari a si pos cjaminâ cun gust ta la Hauptstrasse, visitâ la glesia da la entrada erbosa e il simiteri ator di jè, intun ultin simbolic abràs tra vîfs e muarts. Ta la lûs fioca a si mostrin San Roc e San Sebastian, i onipresints sants suplicâts contro la peste sia di là che di ca da li Alpis, parsè che il mâl, a diferensa dai omins, a nol à cunfins ma al va indevant par la sô strada cuntuna sô logjica a noaltris sconossuda.

Cui che a nol ama l'art e l’incjant dal passât al pos distès vuardàsi ator: li' ocasions a no mancjin. Se a si passa il pûnt su la Drava, cuntuna biela cjaminada tra i prâts tajâts di fresc, a si riva al Gasthaus Rieger.

La sitadina a ei un grum simpatica e la int altretant cordiâl. Ta la Marktplatz, una plassa sigûr antiga, pi lungja che largja, a si faseva e a si fai ancja vuê il mercjât setimanâl, sot il voli atent di un San Florian in mosaic, il sant invocât tant in Carinzia che in Friûl contro il pericul dal fôc ta li' stalis e par chistu rafigurât intant che al implena di aga un podin.

Metuda da pîs, una scrita a dîs: "Hugo Brandner 1967 SMF". La sigla a ricuarda di fat che ta la Scuela Mosaiciscj dal Friûl al è stât alievo in chei agns il zovin Hugo che al à simpri mantignût cu la nestra sitât, e in particolâr cu la Scuela e cul ex diretôr Rino Pastorutti, otims rapuarts di amicisia, rapuarts che a son da considerâ a la base dai positîfs incontros di chiscj ultims agns. Lì dongja, protindint al sêl li sô ramassis imponents, un noglâr maestôs e doi vecjus teis a podaressin contâni tantis altris robis.

Il comun di Sachsenburg al si cjata a 552 m. sul livel dal mâr e a cjapa dentri i paîs di Feistritz, Lanzewitzen, Nigglai e Obergottesfeld.

Il capolôc al è situât diretamentri su la pista ciclabil da la Drava e, par la sô posission centrâl in mies ai lagos e a li' splendidis montagnis da la Carinzia, a si presenta come ideâl lôc di vilegjatura e di ricreassion.
A no mancjin di sigûr albergos ospitâi e simpatichis pensions e un moderno e eficientissim campegjo.

Li' cjaminadis in montagna a son stupendis, tra fajârs secolârs e maestosis forestis di coniferis, dulà che a si cjatin cjervos, cjavriôi e ors.

Grassie a la simpatia e a la cordialitât da la int di Sachhsenburg ogni an, sot li' fiestis, un peç di chistis forestis al fai biela mostra di sê in Plassa Garibaldi plen di lûs e di balis di Nadâl.